ҚОЧОҚИ АШЁИ ҚИМАТБАҲОИ ПОДШОҲИ РУСИЯ БА БРИТАНИЯ

               Лондон, 2 сентябр. (АМИТ «Ховар», Лента.ру). – Агентии иттилоотии Би — Би – Си бо истинод ба маълумоти разведкаи Британия — Ми — 5 хабар медиҳад, ки ашёи қиматбаҳои хонаводаи подшоҳи Русия – Романовҳо пеш аз инқилоби Октябр бо роҳи қочоқ ба Британияи Кабир бурда, баъдан барои дастгирии ҳукумати коммунистон истифода карда шуданд.                Дар ин бозии сиёсӣ нақши қочоқчиро Френсис Майнел бозид, ки ҳамон солҳо муҳаррири рӯзномаи «Дейли Гералд» буд. Ашёи қиматбаҳоро ӯ дар Стокголм қабул карда, ҳамаи онро дар қутиҳои қанди қоғазпеч ҷой намуда, бо роҳи қочоқ ба Британияи кабир бурд. Маблағи умумии ашёи қиматбаҳо аз рӯи нархи ҳамонвақта қариб 40 ҳазор фунт стерлинг буд. Рӯзномаи «Дейли Гералд» таҳти роҳбарии Майнел ҳукумати коммунистонро дар Русия дастгирӣ менамуд.                Хадамоти махсус соли 1916 фаъолияти Майнелро таҳти назорат гирифтанд. Вале Ҷанги якуми ҷаҳон ба ӯ имкон дод, ки фаъолияташро бомуваффақият давом диҳад.                Майнел баъдан зикр намуд, ки ашёи қиматбаҳо баъди ташкили Иттиҳоди Шӯравӣ ба Русия баргардонда шуданд. Дар бойгонии вазорати корҳои хориҷии Британияи Кабир ҳуҷҷатҳои марбут ба ашёи қиматбаҳои хонаводаи Романовҳо мавҷуд аст. Аз рӯи онҳо, арзиши ашёи қиматбаҳо, аз ҷумла, сангҳои қиматбаҳо, бриллиант ва асбобу анҷоми ороиши занона қариб 1 миллион долларро ташкил медиҳад.