ҶАМЪОВАРИИ ПАХТА САР ШУД

                   Душанбе, 17 сентябр. (АМИТ «Ховар», Кристина Эрлих). – Дар Тоҷикистон маъракаи ҷамъоварии пахта сар шуд. Деҳқонони вилояти Хатлон аввалин шуда, ба ҷамъоварии «тиллои сафед» шурӯъ карданд. Хоҷагиҳои вилоят то имрӯз бештар аз 30 ҳазор тонна пахта ҷамъ оварданд. Ҷамъоварии пахта баъди иди Рамазон дар вилояти Суғд ва ноҳияҳои тобеи марказ низ оғоз меёбад.                  Мудири шӯъбаи ғалла ва зироатҳои техникии Вазорати кишоварзӣ Муҳаммадӣ Ормонов ба мухбири АМИТ «Ховар» гуфт, ки алҳол нақшаи аниқи ҷамъоварии пахта муайян карда нашудааст. Комиссияи махсуси вазорат пахтазори хоҷагиҳои мамлакатро санҷида, миқдори ҳосилро муайян менамояд.                  Мухбири АМИТ «Ховар» хабар медиҳад, ки тибқи пешгӯии мутахассисони вазорати кишоварзӣ, имсол бояд хоҷагиҳои мамлакат аз ҳар гектар камаш 20 сентнерӣ ва хоҷагиҳои пешқадам то 40 сентнерӣ ҳосил гиранд.