ҶАВОНОНИ СУҒДӢ ДАР МАКТАБҲОИ ОЛИИ РУСИЯ ТАҲСИЛ МЕКУНАНД

               Душанбе, 1 сентябр. (АМИТ «Ховар», Санавбар Мақсудова). – Ба туфайли паймони роҳбарони вилояти Суғд ва кишвари Олтойи Русия 15 нафар дастпарварони мактабҳои миёнаи вилоят дар Донишгоҳи давлатии тиббии шаҳри Барнаул таҳсил хоҳанд кард. Ду нафари дигар дар мактабҳои олии дигари кишвари Олтой таҳсил мекунанд.                 Сардори раёсати тандурустии вилояти Суғд Ҷалил Тошматов ба мухбири АМИТ «Ховар» хабар дод, ки ҳоло дар муассисаҳои тиббии вилоят 4 ҳазору 337 духтур кор мекунад, бо вуҷуди ин дар вилоят теъдоди зиёди духтурон намерасанд. Миқдори духтурон хусусан дар ноҳияҳои кӯҳистони дурдаст, аз ҷумла, Айнӣ, Кӯҳистони Мастчоҳ, Табошар ва ғайра кам аст.               Ҷ.Тошматов зикр кард, ки танҳо дар Донишгоҳи давлатии тиббии ба номи Абӯалӣ ибни Сино 950 донишҷӯи вилояти Суғд таҳсил дорад. Вале аксари онҳо бо маблағи худ таҳсил мекунанд ва гумон аст, ки баъди хатми таҳсил ба ноҳияҳои дурдаст ба кор раванд.               Падари яке аз донишҷӯёне, ки дар кишвари Олтой таҳсил мекунанд, духтури шикастабанд Абдуғанӣ Абдуазизов мебошад. Вай зикр намуд, ки дар соҳаи тиб собиқаи 14 сола дорад. Духтари ӯ Умеда аз синни хурдӣ орзу дошт, ки хонда духтур шавад. Вай имрӯз ба мақсадаш расид. Умеда ҳамроҳи ҷавонони дигари суғдӣ дар Донишгоҳи давлатии тиббии шаҳри Барнаул таҳсил мекунад. А.Абдуазизов ва волидони дигари донишҷӯён барои ин иқдом аз раиси вилоят Қоҳир Расулзода сипосгузоранд.