БУҶАИ СОЛИ 2010 ЧӢ ҚАДАР ХОҲАД БУД?

                Душанбе, 1 сентябр. (АМИТ «Ховар», Покиза Маҳмадбекова). – Охири ҳафтаи гузашта таҳти раёсати Президенти Ҷумҳурии Тоҷикистон Эмомалӣ Рамон ҷаласаи навбатии Ҳукумати Ҷумҳурии Тоҷикистон баргузор гашт, ки дар кори он наздики 50 масъала баррасӣ шуд.                Дар қатори масъалаҳои муҳим, нишондиҳандаҳои макроиқтисодӣ дида шуданд ва параметрҳои асосии Буҷети давлатӣ барои солҳои 2010-2012 маъқул дониста шуда, барои маълумот ба Маҷлиси Намояндагони Маҷлиси Олии Ҷумҳурии Тоҷикистон пешниҳод карда шуд. Мутобиқи ин санад Маҷмӯи маҳсулоти дохилӣ барои соли 2010 дар ҳаҷми 24, 5 миллиард сомонӣ ва Буҷети давлатӣ 6 миллиарду 954,1 миллион сомонӣ ба нақша гирифта шудааст, ки ин аз нишондиҳандаҳои соли равон мутаносибан 14% ва 25% зиёд аст.               Дар соли 2009 аз ҳисоби 3,4 фоиз коҳиш ёфтани иқтисодиёт камбуди буҷет, инчунин, арзон шудани молҳои содиротӣ, аз ҷумла нахи пахта ва алюминий, кам гардидани хаҷми интиқоли пул аз муҳоҷирони меҳнатӣ буҷет нисбати соли гузашта қариб 30 фоиз камтар пешбинӣ шудааст.               Аз рӯи иттилои Кумитаи омори давлатӣ ҳаҷми истеҳсоли маҳсулоти умумии дохилӣ дар давоми моҳҳои январ – июли соли равон дар Тоҷикистон 9 миллиарду 910 миллиону 523,9 ҳазор сомониро ташкил дод, ки нисбат ба ҳамин давраи соли гузашта 3,1 фоиз зиёд аст.