КӮМАК БА МАКТАБ-ПАРВАРИШГОҲИ №2- НОҲИЯИ РӮДАКӢ

                Душанбе, 1 сентябр. (АМИТ «Ховар», Покиза Маҳмадбекова). — Моҳи шарифи рамазон дар баробари дигар фазилатҳояш аз мардум хайру эҳсон ва саховатпешагиро талаб мекунад. Ин аст, ки мардуми мусулмон дар ин моҳ ба ятиму бечора ва маъюбу дардмандон дасти кӯмак дароз мекунанд. Имрӯз бо ибтикори Раёсати Бонки давлатии амонатгузории Ҷумҳурии Тоҷикистон «Амонатбонк» ба мактаб-парваришгоҳи №2- ноҳияи Рӯдакӣ, ки чанд сол мешавад сарпарастии онро ба ӯҳда дорад, кӯмаки хайрия расонида шуд.                 Тавре ба мухбири АМИТ «Ховар» аз хадамоти матбуоти бонки мазкур иттилоъ доданд, кӯмаки мазкурро маводи ғизоӣ аз қабили орду равған, биринҷу макарон, гӯшту шакар ва дигар хӯроквориҳо дарбар мегиранд.                  Қобили қайд аст, ки мактаб — парваришгоҳи мазкур аз соли 1997 фаъолият намуда, кӯдакони бепарастори аз падару модар ятимондарро фаро гирифтааст. Шумораи умумии муҳассилини мактаб 260 нафар буда, аз он 43 нафараш ятимони тамоман бекас мебошад.