КӮМАКИ БРИТАНИЯИ КАБИР БА МАМЛАКАТҲОИ ОСИЁИ МАРКАЗӢ

                  Душанбе, 23 сентябр. (АМИТ «Ховар» — news.org.). – Мудири шӯъбаи мамлакатҳои Шарқи Наздик, Осиё ва минтақаҳои баҳрии вазорати рушди байналхалқии Британияи Кабир Сю Вордел дирӯз зимни сӯҳбат бо журналистон хабар дод, ки ҳукумати Британияи Кабир барои расондани кӯмак ба мамлакатҳои Осиёи Марказӣ барои амалӣ сохтани барномаҳои рушди иқтисодиёт ва паст намудани сатҳи камбизоатӣ ба маблағи 14 миллион фунт стерлинг кӯмаки моддӣ мерасонад.                   Бояд гуфт, ки сафари Сю Вордел дар Тоҷикистон дирӯз анҷом ёфт. Вай дар фарҷоми сафар барои хабарнигорон нишасти матбуотӣ ташкил намуд.                  Қайд карда шуд, ки маблағи кӯмак дар доираи барномаи нави стратегии ҳукумати Британияи Кабир барои дастгирии мамлакатҳои Осиёи Марказӣ ҷудо карда шудааст.                  Сю Вордел зикр намуд, ки дар давоми ду соли охир дар Тоҷикистон дигаргуниҳои бузург ба амал омаданд. Бо вуҷуди ин қисми зиёди аҳолии мамлакат дар ҳолати қашшоқӣ зиндагӣ мекунад. Намояндаи Британияи Кабир изҳор намуд, ки шароити зиндагии аҳолии деҳот бояд то ҳадди имкон беҳтар карда шавад. Инчунин муборизаро барои пешгирии паҳн гардидани бемориҳои хавфноки сирояткунанда пурзӯр намуда, хавфи афзоиши муҳоҷирати ғайриқонуниро пешгирӣ карда, ба муқобили ришвахӯрӣ тадбирҳои судбахш андешидан зарур аст.                 Қайд карда шуд, ки Ҳукумат бояд барои амалӣ сохтани тадбирҳои зидди бӯҳрон ва афзун гардондани истеҳсоли маҳсулот тадбирҳои самарабахш андешад.                   Яке аз роҳҳои беҳтар намудани вазъият дастгирии буҷети давлатӣ мебошад, гуфт С.Вордел. – Маблағи ҷудонамудани ҳукумати Британияи Кабир низ барои дастгирии буҷети давлат ва иҷрои барномаҳои муҳимтарини иқтисодию иҷтимоӣ истифода бурда мешавад.