КӮМАКИ НАВБАТИИ «АМОНАТБОНК» ДАР МОҲИ ШАРИФИ РАМАЗОН

                Душанбе, 17 сентябр. (АМИТ «Ховар», Покиза Маҳмадбекова). — 17 сентябри соли равон Раёсати Бонки давлатии амонатгузории Ҷумҳурии Тоҷикистон «Амонатбонк» ба мактаб-парваришгоҳи рақами 1 ноҳияи Рӯдакӣ, ки чанд сол мешавад сарпарастии онро бонк ба ӯҳда дорад, кӯмаки хайрия расонид. Кӯмаки мазкурро асбобҳои хониш аз қабили китобу дафтар, қаламу ҷуздон ва дигар лавозимоти дарсӣ, ҳамчунин як миқдор фурузонакҳои каммасраф ташкил медод.                Тавре ба мухбири АМИТ «Ховар» аз дафтари матбуоти «Амонатбонк» иттилоъ доданд, дар моҳи муборак ин бори дуюм аст, ки Амонатбонк ба мактаб – парваришгоҳ кӯмаки хайрия мерасонад. Тарбиятгирандагон ва устодони мактаб аз ин амал қаноатманд буда, миннатдорӣ ва ташаккури бепоёни худро ба кормандони бонки мазкур иброз намуданд.                  Қобили қайд аст, ки дар арафаи ид ва даҳаи охири моҳи шарифи рамазон дар баробари дигар фазилатҳояш аз мардум хайру эҳсон ва саховатпешагиро талаб мекунад. Ин аст, ки мардуми мусулмон дар ин моҳ ба ятиму бечора ва маъюбу дардмандон дасти кӯмак дароз мекунанд.                  Бояд гуфт, ки маротибаи дуюм аст, ки «Амонатбонк» ба мактаб-парваришгоҳи мазкур кӯмак мекунад, ки маблағи умумии он 8 ҳазору 130 сомониро ташкил медиҳад.