ОВОРАГАРД ДАСТ БА ДУЗДӢ ЗАД

               Душанбе, 1 сентябр. (АМИТ «Ховар», Жасмин Назарова). – Тавре ба хабарнигори АМИТ «Ховар» аз дафтари матбуоти Вазорати корҳои дохилии ҶТ иттилоъ доданд, дар ҳудуди ноҳияи Шоҳмансур як далели ғоратгарӣ ба қайд гирифта шуд. Дилором Маҳмадова дар аризаи худ навиштааст, ки шаби 31 августи соли равон, шахси номаълум дар назди беморхонаи рақами 3, ба тариқи ошкоро аз дасташ борхалтаи селофаниро, ки дар дохилаш як адад телефони мобилии тамғаи «Samsung», як адад ҳамён, ки арзишашон ба маблағи 600 сомонӣ мебошад, кашида гирифта аз ҷои ҳодиса ғайб задаст. Дар вақти гузарондани чораҳои фаврӣ — ҷустуҷӯӣ аз ҷониби кормандони шӯъбаи корҳои дохилӣ шаҳрванд Юрий Рогов, соли таваллудаш 1976, бе ҷои зист, дастгир карда шуд, ки аз ӯ далелҳои шайъӣ гирифта нисбаташ парвандаи ҷиноӣ боз шудааст.