218 ҶИНОЯТ ДАР ВИЛОЯТИ СУҒД

                Хуҷанд, 21 октябр. (АМИТ «Ховар», Санавбар Мақсудова). – Сардори Раёсати Агентӣ оид ба назорат аз болои маводи нашъовари назди Президенти Ҷумҳурии Тоҷикистон дар вилояти Суғд генерал – майор Файзулло Абдуллоев дар нишасти матбуотӣ оид ба натиҷаҳои фаъолияти фаврӣ — ҷустуҷӯии Раёсат қайд кард, ки «Дар нӯҳ моҳи соли ҷорӣ дар вилоят 218 ҷинояти вобаста ба гардиши ғайриқонунии маводи нашъаовар ба қайд гирифта шуд. Ниҳодҳои қудратии вилояти Суғд 618 килограмму 152 грамм маводи мухаддирро аз гардиши ғайриқонунӣ боздоштананд, ки аз ин шумора 330 килограммашро маводи сахттаъсири героин ташкил мекунад. Дар ҳамин давраи соли гузашта 722 килограмм маводи нашъаовар гирифта шуда буд, ки 311 килограммашро героин ташкил мекард.                  Кормандони раёсат дар давраи ҳисоботӣ 10 гурӯҳи муташаккили ҷиноятиро, ки аз 113 нафар иборат буд, муайян карданд. Умуман, дар ин давра бо ҷурми даст доштан ба гардиши ғайриқонунии маводи нашъаовар 231 нафар ба ҷавобгарии ҷиноятӣ кашида шуданд, ки аз инҳо се нафарашон шаҳрвандони Ҷумҳурии Қирғизистон мебошанд.