А.АШӮР: КВД «ДАРОМАДИ ПОЧТАИ ТОЧИК» 3.000. 900 СОМОНИ

                  Душанбе, 15 октября. (АМИТ «Ховар», Мавзуна Бойева). — Таҳлили нишондиҳандаҳои рушди маҷмааи нақлиёт ва коммуникатсия нишон медиҳад, ки ба мушкилоти бӯҳрони иқтисодӣ нигоҳ накарда, корхонаву муассисаҳо дар доираи имкон ва шароитҳои мавҷуда аз ӯҳдаи таъмини талабот ва эҳтиёҷоти хоҷагии халқ, нисбат ба хизматрасонӣ баромаданд, ин далели он аст, ки қариб дар ҳама соҳаҳои марбути вазорат рушди мунтазам таъмин гардидааст. Тавассути ҳама намудҳои нақлиёт хаҷми боркашонй ба андозаи 14 млн. 620 ҳазору 800 тонна ва ҳаҷми мусофирбарӣ бошад, 118 млн. 168 ҳазор мусофир таъмин гардид, ки нисбат ба ҳамин давраи соли гузашта мутаносибан 101,3 ва 102,0 фоизро ташкил медиҳанд, гуфт дар нишасти матбуотӣ ба хабарнигорон вазири нақлиёт ва коммуникатсияи ҷумҳурӣ Абдураҳим Ашӯр.                   Ӯ ҳамчунин зикр кард, ки ҷиҳати дастгирии табақаҳои ниёзманди аҳолии мамлакат дар ҳамаи соҳаҳои марбути комплекси нақлиётиву коммуникатсионӣ ба маблағи 1 миллиону 139 ҳазору 661 сомонӣ хизматрасонии имтиёзӣ расонида шудааст. Аз ин ҳисоб дар самти мусофирбарӣ бо нақлиёти автомобилӣ -118 ҳазору 133 сомонӣ, роҳи оҳан — 112 ҳазору 728 сомонӣ, ҳавоӣ 132 ҳазору 99 сомонӣ ва алоқаву почта 776 ҳазору 701 сомонӣ маблағҳо аз худ карда шудаанд.                  Дар ҷумҳурӣ теъдоди истифодабарандагони алоқаи барқӣ ба 334 ҳазору 890 муштарӣ ва алоқаи мобилӣ ба 4 млн. 612 ҳазору 972 муштари расидааст ва он пайваста афзоиш меёбад.                  Миқдори истифодабарандагони фаъоли шабакаи Интернет дар ин давра бо назардошти истифодабарандагони хизмати интернетӣ тариқи пайвасти бесим 505 ҳазору 176 нафарро ташкил медиҳад.                  Аз ҳамаи намудҳои фаъолияти КВД «Почтаи Тоҷик» 3 млн. 900 ҳазор сомонӣ ба даст оварда, иҷроиш нисбат ба ҳамин давраи соли 2008 114,7 % — ро ташкил медиҳад», гуфт дар хотима А.Ашӯр.