БИНОИ НАВИ АМОНАТБОНК ДАР НУРОБОД

                 Душанбе, 28 октябр. (АМИТ «Ховар», Покиза Махмадбекова). — 27 октябри соли равон дар доираи ташрифи Президенти кишвар ба ноҳия Нуробод дар ин шаҳраки навбунёд боз як иншооти навбунёди шӯъбаи дар ноҳияи мазкур будаи Бонки давлатии амонатгузории Ҷумҳурии Тоҷикистон «Амонатбонк», мавриди истифода қарор гирифт.                  Лентаи рамзиро дар чорабинии мазкур Раиси Раёсати БДА ҶТ «Амонатбонк» Маҳмадамин Маҳмадаминов ва намояндагони мақомоти маҳалии ҳокияти давлатии ноҳия буриданд. Ҳамзамон М. Маҳмадаминов ба кормандон ва мутахассисони шӯъбаи мазкур ҷиҳати дар сатҳи зарурӣ ба роҳ мондани хизматрасониҳо, ҷалби муштариён ва фарогирии бештари сокинони ноҳия, дастурҳо дод.                   Садорат ва намояндагии Раёсати Бонк дар минтақаи Рашт ва тамоми кормандони шӯъбаи мазкур аз дастгирӣ ва кӯмакҳоӣ Ҳукумати Ҷумҳурии Тоҷикистон ва Раёсати бонк ҷиҳати бо бинои наву замонавӣ ва таҷҳизоти муосири бонкдорӣ таъмин намудани Шӯъбаи №12 изҳори миннатдорӣ намуданд. Дар назар аст, ки дар оянда вобаста ба шароити фароҳам омада, сатҳи хизматрасониҳоро боло хоҳанд бардошт.                 Бинои мазкур аз ҳисоби маблағҳои дохилии бонк сохта шуда, дар сохтмон, таъмир ва муҷаҳҳазонидани он зиёда аз 1 миллион сомонӣ маблағ масраф гардид.