БОҒҲОИ ШАҲРРО РОҲБАРОНИ НАВ ИНТИЗОРАНД

                 Душанбе, 9 октябр.(АМИТ «Ховар», Марзия Саидова).-Раиси шаҳри Душанбе Маҳмадсаид Убайдуллоев 9 октябр дар бораи эълон намудани озмун барои ишғоли вазифаҳои директорони боғҳои фарҳангу фароғатии шаҳри Душанбе қарор ба имзо расонд.                 Тибқи он барои ишғоли вазифаҳои директорони Боғи фарҳангу фароғатии ба номи устод Айнӣ (ноҳияи Исмоили Сомонӣ), «Кӯли комсомол» (ноҳияи Сино) ва «Дӯстии халқҳо» (ноҳияи Фирдавсӣ) аз 10 –ум то 31 октябри соли 2009 такроран озмун гузаронида мешавад.                  Тибқи иттилои котиби матбуотии Раиси шаҳри Душанбе Шавкат Саидов, дар озмун шахсоне, ки маълумоти олии касбии биологӣ ва агрономӣ, инчунин собиқаи кории роҳбарикунанда доранд, иштирок карда метавонанд. Озмун ба таври кушод гузаронида шуда, 5 ноябр ҷамъбаст мегардад.