БОЗГАШТИ ЁДГОРИҲОИ ТАЪРИХӢ

                 Душанбе, 8 октябр. (АМИТ «Ховар» — afganistan.ru ). — 1 ҳазору 500 адад ёдгориҳои таърихӣ дубора ба Осорхонаи миллии Афғонистон баргардонида шуданд. Дар ин бора Вазири иттилоот ва фарҳанги Афғонистон Абдулкарим Ҳорам ба шабакаи телевизионии «Тулӯъ» иттилоъ додаст: «Экспонатҳои баргардонидашуда, ки аз таъриху фарҳанг, дину оини қадимаи мардуми Афғонистон башорат медиҳанд, дар яке аз фурудгоҳҳои байналмиллалии Британияи Кабир боздошт карда шуданд».                Сафири Британияи Кабир дар Ҷумҳурии Исломии Афғонистон Шепард Коупер изҳор кард, ки бозгашти ёдгориҳои таърихӣ ба Афғонистон бо дастгирии мақомоти ҳифзи ҳуқуқ ва Салиби Сурхи Британияи Кабир, инчунин талошҳои бевоситаи роҳбарияти ЮНЕСКО имконпазир гашт.                Ҳукумати Афғонистон аз ҷомеаи ҷаҳонӣ дархост кард, ки дар баргардонидани ёдгориҳои таърихӣ ва фарҳангии солҳои ҷанг бо роҳи қочоқ аз мамлакат берун кардашуда, кӯмаки амалӣ расонанд.                 Осорхонаи миллии Афғонистон дар замони ҳукмронии «Толибон» хисороти зиёд дид. Бо фармони роҳбари маънавии «Толибон» Мулло Умар ҳазорон ёдгориҳои таърихӣ аз ин Осорхона пурра ва ё қисман нобуд карда шуданд. Дар вилояти Бомиён муҷассамаи Буддо ба таври ваҳшиёна тарконида шуд, ки боиси нигаронии аҳли башар гашт.