ЭКОЛОГИЯРО БОЯД ТОЗА НИГОҲ ДОШТ

                Душанбе, 17 октябр. (АМИТ «Ховар», Покиза Маҳмадбекова). – «Барои вайрон кардани талаботи қонунгузориҳои ҷумҳурӣ дар бахши ҳифзи муҳити зист ва истифодаи сарватҳои табиӣ аз қонуншиканон ба маблағи 410,6 ҳазор сомонӣ ҷарима ва зарар ситонида шуд», гуфт зимни нишасти матбуотӣ Раиси Кумитаи ҳифзи муҳити зист Зикиров Хурсандмурод 16 октябри соли равон.                Ӯ ҳамчунин иброз дошт, ки барои насупоридани пардохтҳои ҳатмии экологӣ, вайрон кардани талаботи қонун оид ба ҳифзи муҳити зист ба Суди иқтисодӣ 48 мавод ба маблағи 1240,7 ҳазор сомонӣ, ба прокуратура 124 мавод ба маблағи 75,8 ҳазор сомонӣ супорида шуд.                  Дар ин давра аз тарафи экспертизаи давлатии экологӣ дар 34 ҷаласаи комиссияи экспертӣ 306 мавод оид ба интихоби қитъаи замин, воридоти нуриҳои минералӣ истифодаи сарватҳои табиӣ, ҷойгиршавӣ ва фаъолияти пешбинишудаи иншоот баррасӣ гардида, ба 246 адади он хулосаҳои асоснок дода шуда, 16 мавод барои пурра кардан баргардонида шуд.                 « Барои беҳтар кардани ҳолати санитарию экологӣ ва бехатарии ҳавзаи дарёи Варзоб аз тарафи сохторҳои марбута, аз ҷумла, Кумитаи ҳифзи муҳти зист, Вазорати тандурустӣ, Вазорати мелиоратсия ва захираи об, Кумитаи ҳолатҳои фавқулодда ва мудофиаи гражданӣ рейдҳои муштарак гузаронида шуданд ва ин то имрӯз давом дорад», гуфт дар фарҷом раиси кумита.