ИСЛОҲОТИ ИҚТИСОДӢ ДАР КИШВАР САМАРАБАХШ АСТ

                Душанбе, 21 октябр. (АМИТ «Ховар», Лаззат Диловарзод).- Татбиқи самарабахши ислоҳоти иқтисодии Ҳукумати ҶТ, кӯшишу талошҳои пайвастаи Президенти кишвар оид ба рушди устувори иқтисодиёт, паст намудани сатҳи камбизоатӣ, тақвияти нерӯи иқтисодии мамлакат ва созандагию бунёдкорӣ имконият доданд, ки дар ноҳияи Ҳисор натиҷаҳои назарраси иқтисодию истеҳсолӣ ба даст оварда шаванд.                Дар ноҳия вобаста ба рушди иқтисодиёт тавассути дастгирии мақомоти маҳаллии ҳокимияти давлатӣ шаклҳои нави хоҷагидорӣ, аз ҷумла, хоҷагиҳои деҳқонию фермерӣ, инфиродӣ ва ҷамъиятҳои саҳомӣ ташкил ёфтанд.                 Имрӯз аз ҷониби соҳибкорони маҳаллӣ марказҳои савдо, ошхонаю тарабхона мағоза ва ҳатто сохтмони хонаҳои истиқоматӣ ба роҳ монда шуда, ҳазорҳо ҷойҳои корӣ барои мардум муҳайё гардонида шудааст.                Ноҳияи Ҳисор шӯҳрати пешинаи худро имрӯз ҳам бо сарбаландӣ нигоҳ медорад.                 Мақомоти маҳаллии ҳокимияти давлатии ноҳия ба соҳаҳои маориф ва тандурустӣ махсус ғамхорӣ намуда, беш аз 60 фоизи маблағро ба рушди ин ду соҳа равона намудааст.                 Ҳамаи ин муваффақиятҳо дар конфронси матбуотие, ки ба ҷамъбасти 9 – моҳаи соли 2009 бахшида шуда буд, баланд садо дод. Ин дастовардҳо аз ҷониби иштирокдорони конфронс хуш қабул гардид.  Маводи ба хабарнигорон пешниҳодгардонидашуда, чун арзишҳои баланди фитрию фарҳангӣ, иқтисодию иҷтимоӣ пазируфта шуданд.