КУМИТАИ АНДОЗ НАҚШАИ 9 – МОҲАРО ИҶРО НАМУД

                 Душанбе, 21 октябр. (АМИТ «Ховар», Лаззат Диловарзод).- Дар конфронси матбуотие, ки ба муносибати ҷамъбасти нӯҳмоҳа дар Кумитаи андози ҷумҳурӣ доир гардид, раиси кумитаи мазкур Нусратулло Давлатов ба хабарнигорони дохил ва хориҷи кишвар иброз дошт, ки сарфи назар аз бӯҳрони молиявии ҷаҳонӣ нақшаи андозҳо ва дигар пардохтҳои ҳатмӣ бо назардошти андози иҷтимоии ғайрибуҷетӣ ба андозаи 103,3 фоиз таъмин гардида, ба ҷои 1558 млн. сомонии дар нақша пешбинишуда 1600,5 млн. сомонӣ ба буҷаи ҷумҳурӣ ворид карда шуд.                 Дар баробари ин, боиси таассуф аст, ки дар ин давра иҷрои 4 намуди андоз, аз қабили андоз аз истифодабарандагони қаъри замин, андози обистифодабарандагон, андози ягона ва боҷи давлатӣ ба қадри зарурӣ иҷро нашуд. Ҳамчунин, андози иҷтимоии ғайрибуҷетӣ аз тарафи мақомоти андози дар ноҳияҳо буда дар 15 ноҳияи вилояти Хатлон, 4 ноҳияи вилояти Суғд ва ноҳияи Варзоб иҷро нагардид.                 Ба ҳамаи ин нигоҳ накарда, ҷамъоварии андоз нисбат ба ҳамин давраи соли 2008 ба қадри 20, 2 фоиз зиёд иҷро гардидааст.                  Дар ин нишасти матбуотӣ ҳисоботи раиси кумита тавассути воситаҳои электронӣ пешкаши ҳозирин гардонида шуд. Сипас саволу ҷавоб миёни хабарнигорон ва кормандони соҳаи андоз бо ҷӯшу хурӯш сурат гирифт ва кормандони васоити ахбори омма ба саволҳои худ ҷавобҳои қаноатбахш гирифтанд.