ЧАРО БАРҚ МУВАҚҚАТАН ҚАТЪ ГАРДИД?

                  Душанбе, 9 ноябр. (АМИТ «Ховар», Кристина Эрлих). — Субҳи имрӯз соати 6 – 35 дақиқа дар хати барқи баландшиддати 500 киловолтаи «Норак — Регар» садамаи техникӣ руй дод. Тавре ба АМИТ «Ховар» аз ширкати холдингии «Барқи тоҷик» иттилоъ доданд, бо сабаби ба таври мухтор кор кардани шабакаҳои барқӣ ҳангоми руй додани садамаи техникии мазкур дар хати баландшиддати «Норак — Регар» дигар истгоҳҳои барқӣ ба таври автоматӣ аз кор монданд. Ба таври мухтор кор кардани шабакаҳои барқӣ барои рӯй надодани садамаҳои бузург дар истгохҳои барқӣ пешбинӣ карда шудааст.                   Роҳбарият ва мутахассисони ширкати «Барқи тоҷик» барои бартараф кардани садамаи техникӣ сафарбар гардиданд.                    «Айни ҳол аксари иншооти ҷумҳурӣ бо қувваи барқ таъмин карда шуданд. Дар соатҳои наздиктарин кори шабакаҳои барқи пурра барқарор карда мешаванд», — иттилоъ дод роҳбари хадамоти матбуотии ширкати холдинги «Барқи тоҷик» Нозир Ёдгорӣ.