ТАЛАФОТИ НЕРӮИ БАРҚРО ПЕШГИРӢ НАМОЕД!

                   Мӯъминобод, 26 ноябр. (АМИТ «Ховар», Сулаймон Холов).-Сардори идораи шабакаҳои барқии ноҳияи Мӯъминобод Зариф Табаров аз напардохтани ҳаққи қувваи барқ аз тарафи ташкилоту муассиса ва аҳолии ноҳия изҳори нигаронӣ карда гуфт, ки қарздорӣ то ин ҷониб дар ноҳия ба 1337400 сомонӣ расидааст, ки нисбати аввали сол 689900 сомонӣ зиёд мебошад. Ба гуфтаи ин манбаъ асосан қарздорӣ аз бемасъулиятии баъзе роҳбарони ташкилоту муассиса ва хоҷагиҳо буда, онҳо барқро истифода бурда, аммо ҳаққи барқро сари вақт пардохт намекунанд. Мавриди зикр аст, ки то ин ҷониб ташкилотҳои «Тоҷиктелеком» ба маблағи 3033 сомонӣ, идораи обтаъминкунӣ 6717 сомонӣ, фабрикаи паррандапарварӣ 5270 сомонӣ, ҶММ « Хайём» 10598 сомонӣ, бонки амонатгузорӣ 1413 сомонӣ ва дигар сохторҳои ҷамъиятӣ аз пардохти қувваи барқ қарздор мебошанд, кӣ ин боиси қарздории зиёд дар ноҳия мегардад. Аммо дар ин маврид роҳбарияти ҳукумати ноҳия тавонист барои сарфакорона истифода бурдани энергия 100 % ташкилоту муассиса ва 95 % — и аҳолиро аз лампаҳои тафсон ба лампаҳои камасраф гузаронад, ки айни ҳол аз 58080 адад лампаҳои тафсони дар ноҳия буда, 55176 донаи ӯ ба лампаҳои каммасраф иваз гардидааст. Вақти он расидааст, ки ба ҳамаи роҳу усулҳои имконпазир сарфи беҳуда ва талафоти нерӯи барқро пешгирӣ намоем,- афзуд Зариф Табаров.