ҚАРЗДОРҲО АЗ БАРҚ МАҲРУМ МЕГАРДАНД

                Душанбе, 5 декабр. (АМИТ «Ховар», Кристина Эрлих) –Тавре ба мухбири АМИТ «Ховар» аз маркази матбуоти Ширкати кушодаи саҳҳомӣ-холдингии «Барқи тоҷик» иттилоъ доданд, мувофиқи супориши роҳбарияти ширкат то 6 декабри соли ҷорӣ ҳамаи қарздорон аз интиқоли барқ маҳрум карда мешаванд.                 Мувофиқи хабари сарчашма тамоми шабакаҳои барқии минтақавӣ, шаҳрӣ ва ноҳиявӣ вазифадор шудаанд, ки ҳамаи корхонаҳо, идораву ташкилотҳо ва маҳаллаҳои истиқоматие, ки то рӯзи 6 декабр қарзҳои худро аз ҳисоби истифодаи барқ пардохт намекунанд, пурра аз барқ бо роҳи қатъ кардани интиқоли он маҳрум мегарданд. «Ин чорабиниҳо бо мақсади таъмин кардани аҳолии деҳот бо барқ дар ҳаҷми 7 соат дар як шабонарӯз ва риояи баробарии истифодаи барқ пеш гирифта шудааст».                   Ёдрас мешавем, ки аз 30 ноябри солӣ ҷорӣ шабакаҳои барқии Тоҷикистон бо реҷаи мухтор фаъолият карда дар як шабонарӯз зиёда аз 45 миллион киловатт соат нерӯи барқ истеҳсол мекунад.