ҶАШНВОРАИ СУРУДУ МУСИҚИИ БАДАХШОН ДАР МАСКАВ

                  Маскав, 15 декабр. (АМИТ «Ховар», Ҳалима Хушқадамова). — 13 декабр дар толори консертии Академияи варзиши Русия ба муносибати рӯзи таваллуди Оғохони чорум ҷашнвораи суруду мусиқӣ ва фарҳанги мардуми Бадахшон баргузор гардид. Ҷашнвора бо ташаббуси созмони ҷамъиятии «Нур» ва фонди мероси фарҳангии «Помир» гузаронида шуд. Дар консерт роҳбарони Намояндагии вазорати корҳои дохилии Тоҷикистон дар Русия, Иттифоқи тоҷикистониёни Русия ва дигарон иштирок доштанд.                   Дар консерти идона мутрибон, раққосон ва овозхонони дастаҳои ҳунарии «Чашмаи Носир», «Равшандилони Рӯшон», «Андалебон», «Ғарибон», гурӯҳи бачагонаи ансамбли фарҳангии «Нур», ҳунарпешагон аз ҷумлаи муҳоҷирони меҳнатии Бошқирдистону Тотористон, овозхонони маъруф Рустам Саидов ва Нобовар Чиноров ҳунарнамоӣ карданд.