ЧАРО ДУХТАРОН АЗ ТАҲСИЛ ДУР МОНДААНД?

                   Кӯлоб, 1 декабр. (АМИТ “Ховар”, Сулаймон Холов).-Таи як соли охир дар минтақаи Кӯлоб беш аз ду ҳазор тан духтар аз таҳсил дур мондааст. Эмомалӣ Саидамиров, мудири маорифи минтақаи Кӯлоб мегӯяд, аслан ин шумори духтарон дар деҳоти дурдаст зиндагӣ мекунанд ва омили аслии дур мондани онҳо аз мактаб дар масофаи дур воқеъ будани мактабҳост. Ба қавли ӯ, аслан дар аксар деҳоти кӯҳистон аз лиҳози кам будани аҳолӣ назди ду ё се деҳа танҳо як мактаб вуҷуд дорад ва ба хотири дур будани масофаи роҳ бештари волидайн садди ба мактаб рафтани духтарон мегарданд, ҳарчанд писарон бемамониат дар ин мактабҳо таҳсил мекунанд.                      Аммо дар ҳамин маврид коршиносон мегӯянд, аксаран масофаи дур барои волидайн баҳонае беш нест. Зарторбӣ Табарова, як коршиноси маҳаллӣ мегӯяд, то ба ҳол бархе волидайн чунин фикр мекунанд, ки духтар танҳо барои хидмат ба шавҳар офарида шудааст. Аз ин рӯ, ба гуфтаи волидайн талош мекунанд, то духтарашонро ба зудӣ ба шавҳар диҳанд.                    Тибқи иттилои ин идора соли гузашта беш аз 4 ҳазор духтар тарки мактаб намуда буд, ки дар соли ҷорӣ наздик ба ду ҳазори онҳо ба мактаб ҷалб шудааст.