МАРКАЗИ БАРҚУ ГАРМИДИҲИИ ДУШАНБЕ БА КОР ДАРОМАД

                  Душанбе , 14 декабр. (АМИТ «Ховар», Фарангис Раҳимова). – Роҳбари дафтари матбуоти Ширкати саҳҳомии «Барқи тоҷик» Нозир Ёдгорӣ ба АМИТ «Ховар» хабар дод, ки маркази барқу гармидиҳии шаҳри Душанбе 11 декабр ба кор шурӯъ намуда, ба шаҳр қувваи барқ ва гармӣ медиҳад. Айни ҳол дар ин ҷо дар давоми шабонарӯз қариб 30 ҳазор киловатт – соат қувваи барқ ва 50 гкеколория гармӣ истеҳсол карда мешавад. Тибқи нақша, истеҳсоли қувваи барқ ва гармӣ тадриҷан зиёд карда хоҳад шуд.                    Н.Ёдгорӣ зикр намуд, ки дар маркази барқи гармидиҳӣ ҳар рӯз 150 тонна мазут ва 200 ҳазор метри мукааб гази табиӣ истифода бурда мешавад. Дар марказ зиёда аз 14 ҳазору 600 тонна мазут захира карда шудааст, ки аз рӯи ҳисобҳои мутахассисон то охири мавсими зимистон кифоя мебошад.                  Қайд карда шуд, ки қувваи барқи дар ин ҷо истеҳсолшуда нисбатан қиматтар мебошад.