МАРОСИМИ ПЕШНИҲОДИ КОРТҲОИ БОНКӢ БАРОИ ШАҲРВАНДОНИ ПОЙТАХТИ

                  Душанбе, 25 декабр. (АМИТ «Ховар», Покиза Маҳмадбекова). — Имрӯз дар шӯъбаи ноҳияи Сино будаи Бонки давлатии амонатгузории Ҷумҳурии Тоҷикистон «Амонатбонк» маросими пешниҳоди кортҳои бонкӣ шаҳрвандони пойтахти шаҳри Душанбе баргузор гардид. Маросими мазкур тибқи дастур ва супоришҳои Президент ва Ҳукумати Ҷумҳурии Тоҷикистон ва дар асоси иҷрои Барномаи пардохти нафақаи аҳолӣ бо кортҳои бонкӣ, бо ибтикори БДА ҶТ «Амонатбонк» ва Вазорати меҳнат ва ҳифзи иҷтимоии ҶТ сурат гирифт.                   Дар маросим роҳбарияту намояндагони БДА ҶТ «Амонатбонк», Вазорати меҳнат ва ҳифзи иҷтимоӣ, ҳокимияти ноҳияи Синои ва нафақахӯрон — истиқоматкунандагони маҳаллаи 91-уми шаҳри Душанбе иштирок доштанд.                  Маросимро бо сухани ифтитоҳӣ Муовини Раиси Раёсати БДА ҶТ «Амонатбонк» Абдуқаҳҳор Қодиров кушода, доир ба тарзу услуб ва истифодабарии кортҳо ба ҳозирин маълумотҳоро дар шакли аёнӣ пешниҳод намуд.                  Дар маросими мазкур ба 50 нафар аввалин нафақахӯрони кишвар кортҳои бонкӣ дода шуд ва онҳо бори аввал тавассути кортҳои мазкур нафақаи худро аз дастгоҳҳои дар дохили бонк насбшудаи банкомат, гирифтанд.                 Барномаи пардохти нафақаи аҳолӣ бо кортҳои бонкӣ, ки бо ибтикори БДА ҶТ «Амонатбонк» дар ҳамкорӣ бо Вазорати меҳнат ва ҳифзи иҷтимоии ҶТ ва бо дастгирии ҳамаҷонибаи Президент ва Ҳукумати Ҷумҳурии Тоҷикистон сурат мегирад, дар ҳоли омӯзиш қарор дорад. Ин барнома бо мақсади дар сатҳи замонавӣ ба роҳ мондан ва таъмин намудани шаффофият дар самти мазкури хизматрасонии бонкӣ, амалӣ карда мешавад.