МУФАТТИШИ ПРОКУРАТУРА 6000 ДОЛЛАРИ ИМА ПОРА ГИРИФТ

                   Душанбе, 22 декабр. (АМИТ «Ховар», Акрам Ҳаитов). — Муфаттиши прокуратураи ноҳияи Ҷиликули вилояти Хатлон Қарақулов А.Н. аз ваколатҳои мансабии худ сӯйистифода намуда, бо роҳи тамаъҷӯӣ ба сифати пора барои қатъ намудани парвандаи ҷиноятӣ нисбати шаҳрванд «З» аз бародари ӯ маблағи пулӣ 8000 доллари ИМА талаб мекунад.                    Рӯзи 2 ноябри соли 2009 тахминан соатҳои 17 муфаттиши прокуратураи ноҳияи Ҷиликули вилояти Хатлон Қарақулов А.Н. ҳангоми гирифтани пора ба маблағи 6000 доллари ИМА аз шаҳрванд «З» дар утоқи корӣ дастгир карда шуда, маблағи 6000 доллари ИМА аз ӯ ҳамчун далели шайъӣ ёфта гирифта шуд.                     Дар ҳаракатҳои Қарақулов А.Н. аломатҳои ҷиноятии дар моддаи 319 қ.4, 316 қ.3 ва 360 Кодекси ҷиноятии Ҷумҳурии Тоҷикистон пешбинишуда дида мешавад. Тафтишот давом дорад.                     Дар ин бора ба АМИТ «Ховар» аз шӯъбаи пешгирии коррупсияи Агентии назорати давлатии молиявӣ ва мубориза бо коррупсияи мамлакат иттилоъ доданд.