МУСОБИҚАИ ДАСТАҲОИ ФУТБОЛИ ИДМ

                  Душанбе, 24 декабр. (АМИТ «Ховар», Пайрав Назаров). — 23 декабр дар Қасри футболи шаҳри Маскав маросими қуръапартоии мусобиқаи 18 – уми дастаҳои футболи мамлакатҳои ИДМ ва Балтика барои ба даст овардани Ҷоми қаҳрамонони Иттиҳод баргузор гардид. Мусобиқаи мазкур аз 16 то 24 январи соли оянда дар Маскав гузаронида мешавад.                   Мухбири АМИТ «Ховар» хабар медиҳад, ки қаҳрамони ҳозираи футболи Тоҷикистон дар лигаи олӣ — дастаи футболбозони «Вахш» — и Қӯрғонтеппа ба гурӯҳи «В» дохил карда шуд. Футболбозони тоҷик дар ин мусобиқа бо дастаҳои «Боку» — и Озарбойҷон, «Хелсинки» — и Финляндия ва «Оқтеппа» — и Қазоқистон қувваозмоӣ хоҳанд кард.                    Дар қувваозмоиҳои хотимавии мусобиқа иштироки раиси Федератсияи ҷаҳонии футбол Йозеф Блаттер ва раиси Федератсияи футболи Аврупо Мишел Платини пешбинӣ карда мешавад.