САБАДИ ЛОИҲАҲОИ ИНВЕСТИТСИОНИИ ТОҶИКИСТОН ЧАНД АСТ?

                   Душанбе, 22 декабр. (АМИТ «Ховар», Бекназари Абӯбакр). — То имрӯз сабади лоиҳаҳои инвеститсионии Ҷумҳурии Тоҷикистон 59 лоиҳаро ташкил медиҳад, ки маблағи умумии он баробар ба 1,85 миллиард доллари ИМА аст. Ин нуқта имрӯз зимни баргузории ҷаласаи натиҷагирӣ аз татбиқ ва маблағгузории лоиҳаҳои Бонки ҷаҳонӣ ва Бонки рушди Осиё дар Тоҷикистон зикр гардид.                      Аз ин 59 лоиҳа, 26 тояшро ба маблағи 188,7 миллион доллари ИМА Бонки ҷаҳонӣ ва 18 лоиҳаро ба маблағи 360 миллион доллари ИМА Бонки рушди Осиё маблағгузорӣ мекунанд.                      Мавриди зикр аст, ки ҷаласаи натиҷагирӣ аз татбиқ ва маблағгузории лоиҳаҳои Бонки ҷаҳонӣ ва Бонки рушди Осиё дар Тоҷикистон соле як маротиба доир гашта, дар он мушкилот ва камбудиҳои дар ҷараёни татбиқи лоиҳаҳо ҷойдошта баррасӣ мегарданд.                      Ёдовар мешавем, ки соли 2008 дар татбиқи 2 лоиҳаи Бонки ҷаҳонӣ, аз ҷумла дар лоиҳаи обтаъминкунии шаҳри Душанбе камбудиҳо ошкор шуда, масъулини Ҳукумати Ҷумҳурии Тоҷикистон ва намояндагони Бонки ҷаҳонӣ ба мувофиқа омаданд, ки дар татбиқи минбаъдаи ин лоиҳа мутахассисони назоратӣ ҷалб шуда, барои кормандони ин лоиҳа курсҳои кӯтоҳмуддати бозомӯзӣ ташкил карда шаванд.