ТАҶЛИЛИ 85 – СОЛАГИИ ПРОКУРАТУРАИ ТОҶИКИСТОН

                Душанбе, 14 декабр. (АМИТ «Ховар»,Таҳмина Ғоибназарова).– Имрӯз дар Душанбе бахшида ба 85 — солагии прокуратураи Ҷумҳурии Тоҷикистон ва Рӯзи кормандони прокуратура ҷамъомади ботантана баргузор гардид. Ҷамъомадро прокурори генералии ҷумҳурӣ Бобохон Бобохонов кушода, дар маърӯзаи хуц роҷеъ ба дастовардҳои прокуратура дар давоми 85 сол сухан ронд.                    Ба ин муносибат ба гурӯҳи калони кормандони беҳтарини мақомоти прокуратура тӯҳфаҳои хотиравӣ ва унвонҳои ифтихорӣ супорида шуданд.                   Инчунин дар назди ҳозирон мутахассисони ҷавони прокуратура савганд ёд карданд. Имрӯз дар мақомоти прокуратураи мамлакат бештар аз ҳазор нафар кор мекунад.                   Мухбири АМИТ «Ховар» хабар медиҳад, ки мақомоти прокуратураи Ҷумҳурии Шӯравии Сотсиалистии Тоҷикистон соли 1924 таъсис ёфта буданд. Яке аз аввалин прокурорҳои мамлакат дар солҳои бистуми асри гузашта Муллоҷон Саъдуллоев буд.                     Прокуратураи Ҷумҳурии Тоҷикистон системаи воҳиди марказонидашудаи мақомотест, ки дар доираи салоҳияташон иҷрои аниқ ва якхелаи қонунҳоро дар саросари мамлакат назорат мекунанд.                      Прокуратураи Тоҷикистон вазифаҳои дигарро низ иҷро менамояд, ки Конститутсия (Қонуни асосӣ) ва қонунҳои дигар муқаррар менамоянд. Асоси фаъолияти прокуратураи мамлакатро таъмини волоияти қонун, таҳкими қонуният ва тартиботи қонун бо мақсади ҳимояи мустақилият ва соҳибихтиёрии Ҷумҳурии Тоҷикистон, ҳуқуқу озодиҳои иқтисодӣ ва сиёсии инсон ва шаҳрванд, асосҳои сохти демократии ҳокимияти давлат ва мақоми қонунии фаъолияти намояндагони мақомоти давлатӣ мебошад.