ВАЗИРИ ФАРҲАНГИ ТОҶИКИСТОН ДАР ТУРКИЯ

                   Истамбул,19 декабр. (АМИТ «Ховар», Катерина Аксакова).-Аз Сафоратхонаи Тоҷикистон дар Туркия ба АМИТ «Ховар» хабар доданд, ки вазири фарҳанги ҷумҳурӣ Мирзошоҳрух Асрорӣ имрӯзҳо дар ҷумҳурии Туркия мусофират дорад.                    М.Асрорӣ зимни сафар дар тадбирҳои бахшида ба 736-солагии вафоти шоир ва муттафакири бузурги тоҷику форс Мавлоно Ҷалолиддини Балхӣ ширкат меварзад, ки дар шаҳри Куния баргузор мегарданд. Тадбирҳои мазкур дар ин ҷо аз 7 то 17 декабр давом карданд. Вазири фарҳанги Тоҷикистон 20 декабр ба ватан бармегардад.                   Мавлоно Ҷалолиддин Муҳаммади Балхӣ шоири машҳури суфимазҳаб буда, соли 1207 дар шаҳри Балх дар оилаи яке аз таблиғгарони равияи суфизм ба дунё омадааст. Фаъолияти адабии Ҷ.Балхӣ асосан дар Туркия гузаштааст. Асарҳои ӯ ба проблемаҳои гуногуни динию мазҳабӣ бахшида шудаанд, достони «Маснавии маънави»-и ӯ масъалаҳои гуногуни мазҳаби суфияро шарҳу тавзеҳ медиҳад.                  Ёдовар мешавем, ки рӯзи таваллуди Ҷалолиддини Балхӣ дар Тоҷикистон ҳар сол 30 сентябр бо тантана ҷашн гирифта мешавад. Дар шаҳри Кунияи Туркия 17 декабр дар рӯзи вафоти шоир Рӯзи ёдбуди он баргузор мегардад.