2009 – СОЛИ АФЗОИШИ ҶИНОЯТ?

                 Душанбе, 11 январ. (АМИТ «Ховар», Бекназари Абӯбакр). — «Дар давоми соли 2009 ба судҳои ҷумҳурӣ 8 ҳазору 564 адар парвандаҳои ҷиноятӣ ворид шуд, ки ин нисбат ба соли 2008-ум 440 адад зиёд аст. Сабаби афзудани парвандаҳо боло рафтани сатҳи ҷинояткорӣ дар кишвар мебошад», — тазаккур дод зимни нишасти матбуотӣ 11 январ, раиси Шӯрои адлияи ҶТ Шермуҳаммад Шоҳиён.                    Ӯ афзуд, ки дар ин давра аз тарафи судҳои ҷумурӣ 22.982 мавод оид ба ҳуқуқвайронкунии маъмурӣ мавриди баррасӣ қарор дода шудааст, ки нисбат ба соли 2008-ум 8 маротиба зиёд аст.                     «Дар баробари дастовардҳо камбудиҳо низ дар соҳа дар соли 2009 мавҷуд буданд. Аз ҷумла, саривақт иҷро нагардидани баррасии парвандаҳо, қабули қарорҳои ғайриқаноатбахш ва амсоли инҳо, ки бевосита ба рушди мунтазами фаъолияти судӣ монеа мешаванд», — идома дод Ш. Шоҳиён.                      Гуфтанист, ки дар давоми соли 2009 ҷиҳати роҳ додан ба камбудиҳо дар фаъолияти корӣ бо қарори Коллегияи тахассусии судяҳои назди Шӯрои адлияи ҶТ нисбат ба 28 нафар судяҳо муҷозоти интизомӣ татбиқ карда шуда, 1 нафар судя бо ҷурми гирифтани ришва ва 16 нафар судяи дигар бо сабаби фаъолияти ғайриқаноатмандашон аз вазифа озод карда шуданд.