БОНКИ МИЛЛӢ: 2558 МЛН. СОМОНӢ ЗАХИРАИ ПУЛӢ

                  Душанбе, 25 январ. (АМИТ «Ховар», Бекназари Абӯбакр). — Гардиши савдои хориҷии Тоҷикистон дар давоми соли 2009-ум 3578,7 миллион доллари ИМА-ро ташкил дод, ки нисбат ба соли 2008-ум 23,5 фоиз кам аст. Ин нуқтаро раиси Бонки миллии Тоҷикистон Шариф Раҳимзода 25 январ, зимни нишасти матбуотӣ иттилоъ дод.                    Ӯ афзуд, ки аз ҷумла содирот ба 1010 миллион доллари ИМА ва воридот ба 2568,7 миллион доллари ИМА баробар шуд, ки камшавии он 28,2 фоиз ва 21,4 фоизро ташкил дод. Касри тавозуни савдо – 1558,7 миллион даллари ИМА буда, камшавии камшавиаш нисбат ба соли 2008-ум 16,4 фоиз мебошад.                      Раиси Бонки миллӣ ба саволҳои сершумори хабарнигорон посухҳои мушаххас дода, иттилоъ дод, ки захираҳои пулии БМТ 2558 миллион сомониро ташкил доданд, ки нисбат ба соли 2008-ум 37,8 фоиз зиёд аст. Ҳаҷми пулҳои нақди дар муомилотбуда ба 2041,3 миллион сомонӣ баробар шуда, нисбат ба соли 2008-ум 30,3 фоиз афзудааст.