ДАР ГАИТИ БОЗ ЗАМИН ҶУНБИД

                  Порто — Пренса, 25 январ. (АМИТ «Ховар» — рбк.ру). — Дирӯз дар Гаити боз замин сахт ҷунбид. Қувваи он аз рӯи ҷадвали Рихтер ба 5,5 балл мерасид. Аз рӯи маълумоти Раёсати геологии ИМА, маркази зилзила дар масофаи 41 километрии самти ғарбии пойтахти мамлакат воқеъ буд.                     Тавре хабар дода шуда буд, пойтахти Гаити дар натиҷаи зилзилаи шадиди 13 январ баамаломада қариб тамоман харобу валангор гардидааст.                     Ҳукумати мамлакат 25 январ дар бораи теъдоди ҳалокшудагон хабари нав чоп кард. Дар хабар гуфта мешавад, ки то имрӯз дар шаҳри Порто — Пренса ва маҳалҳои атрофи он зиёда аз 150 ҳазор нафар дар қабристонҳои умумӣ дафн карда шуд. Ҳеҷ кас намедонад, ки дар зери харобаҳои биноҳо чанд нафари дигар боқӣ мондааст. Наҷотдиҳандагон дигар ба зинда мондани онҳо боварӣ надоранд.                      Мақомоти дахлдори Гаити зикр менамоянд, ки шумораи қурбониёни зилзила ба 200 ва ҳатто 300 ҳазор нафар расида метавонад.                       Ёдовар мешавем, ки 13 январи соли 2010 дар Гаити замин бо қувваи 7 балл ҷунбида буд. Дар натиҷаи ин фалокат тамоми биноҳои пойтахти мамлакат қариб тамоман хароб гардид. Аз рӯи маълумоти мавҷуда, 250 ҳазор нафар маҷрӯҳ шуда, қариб 1 миллион нафари дигар бесарпаноҳ мондааст.