ФАЪОЛИЯТИ БАЪЗЕ СОЗМОНҲОИ ҒАЙРИИСЛОМӢ БОЗДОШТА ШУД

Душанбе,  29 январ. (АМИТ «Ховар», Таҳмина  Ғоибназарова). —  Аз  Раёсати  масъалаҳои  дини   Вазорати  фарҳанги  ҷумҳурӣ  ба  АМИТ «Ховар»  хабар  доданд, ки  фаъолияти  9  ташкилоти   динии  ғайриисломӣ бо  сабаби   сари  вақт  пешниҳод  накардани ҳуҷҷатҳояшон  боздошта  шуд. Қайд карда шуд, ки  ҳамаи  ин  созмонҳо қаблан  дар бораи  зарурати пешниҳоди ҳуҷҷатҳо  огоҳ  карда шуда буданд. То  имрӯз  аз  81 ташкилоти  динӣ  72  ташкилот  дар Раёсати  масъалаҳои дини  вазорат ба  қайд  гирифта шуданд.   Ташкилотҳои дигари динӣ ҳуҷҷатҳои  заруриро ба  раёсат   пешниҳод  менамоянд. Фаъолияти онҳо  вобаста ба  оинномаҳояшон  манъ  карда  нашудааст. Масъалаи  давом додани  фаъолияти  созмонҳои  динӣ  баъди  пешниҳоди  ҳуҷҷатҳои  зарурӣ ҳаллу  фасл  карда  мешавад. Бояд  гуфт, ки  ҳамаи  ташкилотҳои  динӣ  бояд  ҳар  сол  дар  раёсати  мазкур  ба  қайд  гирифта  шаванд.