ФУТБОЛБОЗОНИ ТОҶИК БА ТУРКМАНИСТОН МЕРАВАНД

                   Душанбе, 27 январ. (АМИТ «Ховар», Пайрав Назаров). — Дастаи футболи «Истиқлол» дар мусобиқаи байналхалқии 16 – ум барои ба даст овардани Ҷоми Президенти Туркманистон иштирок хоҳад кард, ки аз 20 феврал то 1 март дар шаҳри Ашқобод баргузор мегарданд.                      Мусобиқаи мазкур 7 сол боз гузаронида мешавад ва маблағи мукофоти он 35 ҳазор доллари ИМА – ро ташкил медиҳад. Аз ин маблағ барои ҷои якум 20 ҳазор доллар, барои ҷои дуюм 10 ҳазор доллар ва барои ҷои сеюм 5 ҳазор доллар ҷудо карда мешавад.                        Мухбири АМИТ «Ховар» хабар медиҳад, ки дар мусобиқаи мазкур дастаҳои футболи 19 мамлакати ҷаҳон ширкат варзидаанд. Соли гузашта мукофоти асосии мусобиқаи мазкурро дастаи футболи Донишгоҳи байналмилалии Туркманистону Туркия ба даст оварда буд.