ИШТИРОКИ ШИРКАТҲОИ ТУРИСТИИ ТОҶИКИСТОН ДАР ЯРМАРКАИ ТУРИСТИИ «ITB BERLIN»

                  Душанбе, 11 январ.(АМИТ «Ховар», Марзия Саидова).- Беш аз даҳ ширкати туристии Тоҷикистон – «Авиатур», «Тоҷикинтурсервис», «Кафолат», Ассосиатсияи экофарҳангии туристии «Бадахшон», Ассосиатсияи рушди туризми Тоҷикистон «Зарафшон» ҷиҳати иштирок дар ярмаркаи байналмилалии «ITB Berlin», ки з 10 то 14 марти соли 2010 дар пойтахти Германия шаҳри Берлин баргузор мегардад, иштирок менамоянд. Дар ин хусус ба АМИТ «Ховар» муовини Раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Лочин Файзуллоев иттилоъ дод.                    Ҳадаф аз ташкили ярмаркаи «ITB Berlin» ҷалби таваҷҷӯҳи дӯстдорони туризм ба кишварҳои туристӣ, рушди сайру саёҳат, муаррифии маҳсулоти туристӣ, ба роҳ мондани ҳамкориҳои судманд байни ширкатҳои туристӣ, имзои қарордодҳои ҳамкорӣ ва табодули таҷрибаи пешрафта дар соҳаи туризм мебошад.                    Дар ярмарка ширкатҳои туристии 150 давлати ҷаҳон маҳсулот ва имкониятҳои туристии худро дар масоҳати 180 ҳазор метри мураббаъ муаррифӣ менамоянд. Ширкатҳои туристии Ҷумҳурии Тоҷикистон 44 метри мураббаъи масоҳати ярмаркаро ба иҷора хоҳанд гирифт.                      Назар ба иттилои Лочин Файзуллоев дар давоми солҳо 2008-2009 ширкатҳои туристии Тоҷикистон дар чандин намоишгоҳҳои байналмилалии туристӣ, ки дар шаҳрҳои Москва, Токио, Лондон, Остона, Бишкек ва Тошканд баргузор шуданд, иштирок намуда, маҳсулот ва имкониятҳои туристии Тоҷикистонро муаррифӣ карданд.