ИСТЕҲСОЛИ НЕРӮИ БАРҚ АФЗУД

                   Душанбе, 21 январ. (АМИТ «Ховар», Наргис Бояхмедова). — Нерӯгоҳи барқи обии «Сантӯда – 1» соли 2009 истеҳсоли қувваи барқро 51 фоиз зиёд кард. Соли гузашта дар ин ҷо 1,7 миллиард киловатт – соат қувваи барқ истеҳсол карда шуд.                   Аз дафтари матбуоти нерӯгоҳ ба АМИТ «Ховар» хабар доданд, ки дар давоми ду соли фаъолияти он қариб 2977,4 миллион киловатт – соат қувваи барқ истеҳсол карда шудааст.                    Зикр карда шуд, ки айни ҳол аз 4 агрегати нерӯгоҳ 3 агрегат кор мекунад. Яке аз агрегатҳо мувофиқи нақша тармим карда мешавад. НБО «Сангтӯда – 1» айни ҳол дар як шабонарӯз ба ҳисоби миёна аз 5,6 то 6 миллион киловатт – соат қувваи барқ истеҳсол мекунад.                    Директори генералии нерӯгоҳ Владимир Белов зикр кард, ки соли 2010 вазифаҳои асосии маъмурият ва мутахассисони он таъмини фаъолияти муттасил, самарабахш ва бехатари нерӯгоҳ, вусъат додани имкониятҳо барои содир кардани қувваи барқ дар давраи тобистон, таъмини вазъияти мӯътадили молиявӣ, иҷрои қарордод бо ҷониби Тоҷикистон ва ғайра мебошанд. Сари вақт ворид гардидани маблағ имкон медиҳад, ки таҷҳизоти нерӯгоҳ дар мӯҳлати муқарраршуда тармим карда, истеҳсоли қувваи барқ зиёд гардонда шавад, гуфт В.Белов.