МУЛОҚОТ ДАР ВАЗОРАТИ МОЛИЯ

                   Душанбе, 5 января. (АМИТ «Ховар», Покиза Маҳмадбекова). — 3 январ вазири молияи Ҷумҳурии Тоҷикистон Сафаралӣ Наҷмиддинов бо ҳайати ҳукуматии Ҷумҳурии Исломии Эрон таҳти роҳбарии муовини аввали вазири энергетикаи ин мамлакат Ҳамид Читчиён мулоқот кард.                   Дар мулоқот сафири кабири Тоҷикистон дар Эрон Рамазон Мирзоев ва намояндагони баъзе вазорату идораҳои мамлакат ҳузур доштанд.                    Мухбири АМИТ «Ховар» хабар медиҳад, ки дар ҷараёни мулоқот ҷараёни иҷрои барномаҳое, ки Эрон барои амалӣ сохтани онҳо маблағ ҷудо кардааст, масъалаи ҷудо кардани маблағи иловагӣ барои ривоҷ додани ҳамкории минбаъда, рафти сохтмони НБО «Сангтӯда — 2» ва анҷоми сохтмони туннели «Истиқлол» муҳокима шуданд. Ҳар ду ҷониб паймон карданд, ки сохтмони ин иншоотҳо тезонида ва дар мӯҳлати муқарраршуда ба истифода дода шаванд.                     Иштирокчиёни мулоқот инчунин имкониятҳои ҷудо кардани маблағро аз ҷониби Эрон барои сохтмони иншоотҳои нави энергетикӣ дар Тоҷикистон, аз ҷумла нерӯгоҳҳои барқи обии Айнӣ ва Шӯроб, инчунин нерӯгоҳи хурди барқии Искандаркӯл баррасӣ намуданд.                     Ҷониби Эрон хабар дод, ки барои анҷоми сохтмони туннели «Истиқлол» ба таври илова 5 миллион доллари ИМА ҷудо карда мешавад. Вазири молияи Тоҷикистон С.Наҷмиддинов ба мусоҳибонаш изҳори сипос намуд.