МУШАКПАРРОНӢ БА СӮИ КОНСУЛХОНАИ ИМА

                  Кобул, 11 январ. (АМИТ «Ховар» — рбк.ру). — Рӯзи шанбе дар Афғонистон як хизматчии ҳарбии амрикоӣ бар асари таркиши минаи аз масофаи дур идорашаванда ҳалок гардид.                    Ғайр аз ин силоҳбадастони ҷунбиши «Толибон» дар вилояти Урузгон бо кӯмаки минаҳои аз масофаи дур идорашаванда як мошини зиреҳпӯши қувваҳои мусаллаҳи ҳукуматиро тарконданд. Дар натиҷа 8 нафар низомии маҳаллӣ ба ҳалокат расид.                    Ҳамон рӯз дар шаҳри Ҳирот ба сӯи консулхонаи ИМА чанд мушак парронда шуд. Яке аз онҳо дар ҳавлии бино афтода таркид. Бар асари ин амалиёт касе осеб надидааст. Қайд карда мешавад, ки ҳукумати ИМА бинои мазкурро соли 2009 харида, онро ба консулхона табдил дода буд. Баъди як рӯи ин воқеа яке аз мошинҳои зиреҳпӯши қисмҳои ҳарбии Дания дар натиҷаи таркиши мина хароб гардид. Як аскари даниягӣ ҳалок ва панҷ нафари дигар сахт маҷрӯҳ шуд.