ҲАМКОРИИ ПАРЛУМОНҲОИ ТОҶИКИСТОН ВА РУСИЯ

Маскав, 17  феврал. (АМИТ «Ховар», Ҳалима  Хушқадамова). —  16  феврал  дар  Шӯрои  Федератсияи  Русия  таҳти  раёсати  раиси  Шӯрои  Федератсия  Сергей  Миронов  дар  мавзӯи «Афзун  гардонидани  самараи  ҳамкории  дуҷониба  ва бисёрҷонибаи  Шӯрои  Федератсия  бо  парлумонҳои  мамолики  ИДМ»  машварат  баргузор  гардид.   С.Миронов  зарурати бештар   ривоҷ  додани  ҳамкориро  бо   парлумонҳои  мамолики  ИДМ  таъкид  намуд. Вай зикр намуд, ки  соли равон раёсати ИДМ — ро Федератсияи  Русия  ба  зимма  гирифтааст. Мо  бояд  аз ин  имконият  барои   пурзӯр  намудани  равобити  дуҷонибаю  бисёрҷонибаи  парлумонҳо  дар  доираи  Иттиҳод  истифода барем, гуфт С.Миронов. Ба  қавли  ӯ, ҳамкории   парлумонҳои  мамолики  ИДМ  аз  ибтидо  хусусияти  бисёрсоҳа  ва  гуногунҷабҳа  дошт.  Айни  ҳол  фаъолияти  Ассамблеяҳои  байнипарлумонии  ИДМ,   Иттиҳоди  иқтисодии  Евразия,  СААД ва  ғайра  назаррас  мебошад. Русия  ба  фаъолияти  муштараки  комиссияҳои  байнипарлумонӣ  бо  Тоҷикистон, Қазоқистон  ва  Қирғизистон  аҳамияти  калон  медиҳад. С.Миронов  ба ҳамкории  дуҷонибаи  парлумонҳои  Русия  ва  Тоҷикистон  баҳои  баланд  дод. Қайд  карда  шуд, ки   мулоқоти  чоруми  намояндагони  парлумонҳои   Русия  ва  Тоҷикистон  тирамоҳи  соли  равон  дар  Душанбе баргузор  мегардад. Раиси  Шӯрои  Федератсия  пешниҳод  кард, ки  тӯли  солҳои оянда   бо  парлумонҳои  ҷумҳуриҳои  соҳили  Балтика   ҳамкорӣ  ба  роҳ  монда  шавад. Дар  доираи  ҷашни  65 – солагии  ғалаба   дар  Ҷанги  Бузурги  Ватанӣ   дар  мамлакатҳои  ИДМ  силсилаи  тадбирҳои  гуногун  ба  нақша  гирифта шудаанд. Муовини  вазири  корҳои  хориҷии  Русия  Андрей  Денисов  хабар  дод, ки  ба  ин  муносибат   7  апрел  дар  шаҳри  Санкт – Петербург  конфронси байналмилалӣ  ва  8  май дар Маскав   мулоқоти  ғайрирасмии  сарони  мамлакатҳои  ИДМ  ба  нақша  гирифта  шудаанд.