МАРОСИМИ СУПОРИДАНИ ҶОИЗАҲОИ ОЗМУНИ БАЙНАЛХАЛҚӢ

Душанбе,   5  феврал. (АМИТ «Ховар», Фарангис  Раҳимова). – 8  феврал  дар  пойтахти  Ҷумҳурии  Исломии  Эрон —  Теҳрон  маросими ботантанаи  супоридани  ҷоизаҳо ва  мукофотҳои  хотиравӣ  ба  ғолибони   озмуни  байналхалқии  «Китоби беҳтарини  соли  Эрон»  баргузор  мегардад. Дар  байни  ғолибони озмуни  мазкур   намояндаи  Тоҷикистон Муҳаммадсалом  Махшулов  низ ҳаст. Ӯ  асарҳои  илмии «Таърихи  муносибатҳои  мутақобалаи  Эрон ва  ислом» ва «Инсони  комил дар  ислом» — и Муртазо Мутаҳарриро   аз  форсӣ ба  забони русӣ  тарҷума  намудааст. Тарҷумаҳои  М.Махшулов  дар  бахши «Исломшиносӣ  дар  илми  эроншиносӣ»  асарҳои  беҳтарин дониста шуданд. Хабар  дода  мешавад, ки  инчунин  тарҷумаи  асарҳои  илмии  мутафаккирони  машҳури  исломӣ  Абдулҳусейн  Зарринкӯб – «Фарҳанги  исломӣ»,  Муртазо  Мутаҳаррӣ — «Масъалаҳои  ҳиҷоб», «Мақоми  ҳуқуқии  зан  дар  ислом», Саидҳусейн  Саравӣ — «Қиссаҳои беҳтарин» ба  қалами  М.Махшулов  тааллуқ  дорад. Тарҷумаи  асарҳои  мазкур  дар  нашриётҳои  илмии  Русия  чоп  шудаанд. Мухбири  АМИТ «Ховар»  хабар  медиҳад, ки   мувофиқи  анъана   ҷоизаҳои  озмуни  мазкурро  шахсан  Президенти  Эрон  Маҳмуд  Аҳмадинажод  месупорад.