ПРЕЗИДЕНТИ НАВИ УКРАИНА САВГАНД ЁД МЕКУНАД

Душанбе,  24  феврал. (АМИТ «Ховар»). —  Ваколатҳои  Президенти  ҳозираи  Украина  Виктор  Юшенко  25  феврал  ба  охир  мерасад.  Ҳамон  рӯз  маросими  савгандёдкунии  президенти  нави  мамлакат Виктор  Янукович  баргузор  хоҳад  гашт. Хабар  дода  мешавад, ки ба  маросими  савгандёдкунии  В.Янукович  қариб  100  ҳайати  мамлакатҳои  хориҷӣ,  аз  ҷумла   сарони  давлатҳои  Булғористон,  Туркия,  Руминия,  Маҷористон, Литва, Лаҳистон,  Латвия, Иттиҳоди  Аврупо, ИМА, мамлакатҳои  ҳамсоя, ИДМ,  инчунин  мамлакатҳое  даъват  шудаанд, ки  бо  Украина  муносибатҳои  хуби  тиҷоратӣ  доранд. Ҷамъомади  тантанавӣ  25  феврал  бо маросими  савгандёдкунии  президенти  нави  мамлакат В.Янукович  дар  Радаи  олии Украина  оғоз  меёбад. Баъди он  роҳбарияти  қувваҳои  мусаллаҳи  мамлакат  дар  назди  президент ва  котиботи он   савганди  садоқат  ёд  мекунанд. Сипас  дар Қасри  Украина  «зиёфати  хоксорона»  ороста  мешавад.  Ҳамон рӯз  инчунин  силсилаи  мулоқотҳои  дуҷониба ба  нақша  гирифта  шудаанд. Муовини роҳбари  Ҳизби  минтақаҳои  Украина  Сергей  Левочкин  ба  хабарнигорон  гуфт, ки  тамоми  чорабиҳои  маросими  савгандёдкунӣ  бе ягон тантанаи  зиёдатӣ ва  хоксорона  гузаронида  мешавад. Мо   ҳамаи  онҳоро тавре  мегузаронем, ки  халқи  Украина  аз  президенти  худ  ифтихор  кунад,  гуфт  вай.