СЕХИ ОКСИГЕН БА ИСТИФОДА ДОДА ШУД

Ваҳдат, 22 феврал. (АМИТ «Ховар», Зебо Давлатова).- Тавре ба мухбири АМИТ «Ховар» директори ҷамъияти саҳомии кушодаи «Заводи таъмири механикӣ»-и шаҳри Ваҳдат Тоҳир Икромов иттилоъ дод, корхонаи мазкур барои сохтмони НБО -и «Роғун» ва шабакаҳои барқии ҷумҳурӣ дар давоми соли гузашта ба маблағи 1 мил. 781ҳазору 468 сомонӣ маҳсулот истеҳсол кард. Умуман, дар ин давра ба маблағи 2 мил. 232 ҳазору 602 сомонӣ маҳсулот ба фурӯш бароварда шуда, музди меҳнати коргарон то ба 556 сомони боло бурда шуд.  «Сехҳои завод, ки солҳои тӯлонӣ бе таъмир ва аксари дастгоҳҳо корношоям гардида буданд, бо маблағҳои худӣ аз таъмир бароварда шуд. Ҳамчунин коргоҳи истеҳсоли оксиген ба истифода дода шуд», -гуфт дар анҷоми сӯҳбат Т. Икромов.