ҚАДРДОНИИ МЕҲНАТИ ЖУРНАЛИСТОНИ БЕҲТАРИНИ ВИЛОЯТ

Хуҷанд,  12 март. (АМИТ «Ховар», Санавбар  Мақсудова). —  11  март  дар  шаҳри  Хуҷанд  бахшида ба  Рӯзи  матбуоти  тоҷик  ҷамъомади  серодам  баргузор  гардид. Дар он   намояндагони  мақомоти иҷроияи  ҳокимияти  маҳаллӣ,  кормандони   воситаҳои  ахбори оммавӣ,  радиою телевизион,   собиқадорони  матбуот ва  меҳмонон  иштирок намуданд. Ҷамъомадагонро  ба  шарафи  Рӯзи  матбуоти  тоҷик  котиби  шӯъбаи  вилоятии  Иттифоқи  журналистони  Тоҷикистон Илҳом  Ҷамолиён  табрик  намуд.  Муовини  раиси  вилоят Ваҳоб  Набиев аз  номи  раиси  вилоят  Қоҳир  Расулзода  ва корманди  маъмурияти   шаҳри  Хуҷанд  Зулфия  Умарова  ҳозиронро  аз  номи   раиси  шаҳри  Хуҷанд  Содиқҷон  Мирхолиқов табрик  намуданд. Ба  муносибати Рӯзи  матбуоти  тоҷик  ба журналистони  беҳтарин  ифтихорномаҳо ва  тӯҳфаҳои  қиматбаҳо супорида шуданд. Аз  ҷумла,  муовини  сармуҳаррири  ҳафтаномаи  вилоятии «Ҳақиқати  Суғд»  Тавҳида  Ҷӯраева,  мухбири  телевизиони   вилоятӣ  Хуршед  Раҳмонов,  мухбири  махсуси  Агентии  миллии  иттилоотии «Ховар»  дар  вилояти  Суғд Санавбар  Мақсудова,  мухбири радиои  «Озодӣ»  дар  вилояти  Суғд  Маъсум Муҳаммадраҷаб,  наворбардори  бунгоҳи  иттилоотии  Шабакаи  аввали   телевизиони  Тоҷикистон  дар  вилояти  Суғд Дилшод  Юсуфов,  директори телевизиони  ғайридавлатии  маҳаллӣ «СМ – 1» Акрам  Урунов,  директори ширкати  ғайридавлатии  телевизион  ва радиои  «Азия»  Аъзамхон  Акбаров  ва  мухбири   рӯзномаи  вилоятии  «Ҳақиқати  Суғд»  Рафоат Мӯъминова  сазовори  ифтихорномаҳо,  сипосномаҳо ва  саҳмияҳои  НБО «Роғун»  гардиданд. Дар  фарҷоми  ҷамъомад  консерти  калони  идона  намоиш дода шуд.