ДАР СУҒД ТАЪСИСИ НАШРИЯҲОРО ҶАШН ГИРИФТАНД

Душанбе, 26 март. (АМИТ «Ховар», Бекназари Абӯбакр). 25 март дар чойхонаи Боғи миллии «Ваҳдат» вилояти Суғд бахшида ба 80 -солагии таъсисёбии рӯзномаи вилоятиии «Ҳақиқати Суғд» ва 75 -солагии нашр шудани аввалин шумораи «Согдийская правда» ҷамъомади тантанавӣ баргузор гардид. Таҷлили ҷашни пуршукӯҳи нашрияҳои мақомоти иҷроияи ҳокимияти давлатии вилоят – «Ҳақиқати Суғд» ва «Согдийская правда» бо иштироки қаламкашони шаҳру ноҳияҳои вилоят, ходимони ин рӯзномаҳо ва собиқадорони соҳа ҷараён гирифт. Раиси вилояти Суғд Қоҳир Расулзода ҳамаи корамандони ин рӯзномаҳоро бо ҷашнашон табрик намуда, зикр кард, ки дар тӯли фаъолияташ рӯзномаҳои номбурда барои тарғибу ташвиқи сиёсати давлату Ҳукумат ва пешрафти ҷомеъа саҳми арзанда гузоштаанд.             Раиси вилоят ба чанд нафар рӯзноманигорони нашрияиҳои мазкур унвони Аълочии матбуоти Ҷумҳурии Тоҷикистон ва сипосномаҳои мақомоти иҷроияи ҳокимияти давлатии вилояти Суғдро супорид. Ёдовар мешавем, ки дар идораи рӯзномаи вилоятии «Ҳақиқати Суғд» бахшида ба ин ҷашн нимпайкараи аввалин муҳаррири рӯзномаи мазкур Муҳаммадҷон Ҳасанов гузошта шуд. 25 марти соли 1930 дар шимоли Тоҷикистон аввалин рӯзномаи расмӣ бо номи «Колхозчӣ» ба ҳукми инъикосгари воқеии ҳаёти мардуми меҳнатӣ рӯи кор омад. Сипас ин рӯзнома ба «Роҳи колхозчӣ», «Пролетари Хуҷанд», «Болшевики Хуҷанд», «Бо роҳи ленинӣ», «Стахановчӣ», «Ҳақиқати Ленинобод» табдили ном кард. Имрӯз ин рӯзнома ҳамчун нашрияи расмии мақомоти иҷроияи ҳокимияти давлатии вилояти Суғд бо номи «Ҳақиқати Суғд» чоп мешавад.