ИНТИХОБОТИ МАҶЛИСИ МИЛЛИИ МАҶЛИСИ ОЛИИ ҶУМҲУРИИ ТОҶИКИСТОН

Душанбе,  10 март. (АМИТ «Ховар»,  Людмила  Дубинина). —  Аз  11 то 18   март   пешбарии  номзадҳо  ба Маҷлиси  миллии  Маҷлиси олии  ҷумҳурӣ  оғоз  меёбад. Интихоботи  Маҷлиси  миллӣ  одатан  баъди   10 рӯзи   гузаронидани  Маҷлиси  намояндагон  оғоз  ёфта,  7  рӯз  пеш  аз  ба  қайдгирии  номзадҳои  пешбаришуда  анҷом  меёбад. Дар  моддаи 6 – уми  Қонуни  конститутсионӣ «Дар  бораи  интихоботи  Маҷлиси  Олии  Ҷумҳурии  Тоҷикистон»  сухан  дар бораи   интихоботи  мустақим  ва  нисбӣ  меравад.   Интихоботи  вакилони  Маҷлиси  намояндагон ва маҷлисҳои  маҳаллии  вакилони  мардумӣ   интихоботи  мустақим  мебошанд,  зеро  ҳар  шаҳрванд  ба  тарафдории  ин ё  он  номзад   мустақиман  ё  бевосита  овоз  медиҳад. Интихоботи  Маҷлиси  миллӣ  интихоботи  нисбӣ  ё  бавосита  мебошад,  зеро  аз   се  ду  кисми   аъзои Маҷлиси  миллиро  вакилони  маҷлисҳои  маҳаллӣ  интихоб  мекунанд,  аз  се  як  қисми  онҳоро  Президенти  ҷумҳурӣ бо  фармони  худ  таъин  менамояд.  Аз  Комиссияи  марказии  интихобот  ва  раъйпурсӣ   ба  АМИТ «Ховар»  хабар  доданд, ки  барои гузаронидани  интихоботи  аъзои  Маҷлиси  миллӣ  дар   мамлакат  панҷ  комиссияи  интихоботӣ  ташкил  карда  шуд.  Аз  ҳар  ҳавзаи  интихоботӣ   панҷ  узви  Маҷлиси  миллӣ  интихоб  карда  мешавад. Маҷлисҳои  маҳаллии  вакилони  мардумӣ 25 узви Маҷлиси  миллиро  интихоб  менамоянд.  Ҳашт узви  Маҷлиси  миллӣ  бо  фармони  Президенти  мамлакат  таъин  карда  мешавад.  Президенти нахустини  Ҷумҳурии  Тоҷикистон  узви якумрии   Маҷлиси  миллӣ  мебошад. Ҳамин  тариқ,  25  март  дар  шаҳри  Душанбе,  ноҳияҳои тобеи  марказ,   шаҳрҳои  Хуҷанд,  Қӯрғонтеппа  ва  Хоруғ вакилони  маҷлисҳои  маҳаллӣ  номзадҳояшонро  ба   узвияти  Маҷлиси  миллӣ  пешбарӣ  менамоянд.