НИЁЗ БА 7 МЛН. КВТ СОАТ НЕРӮИ БАРҚ

Душанбе, 30 март. (АМИТ «Ховар», Лаззат Диловарзод).- Бино ба иттилои сармуҳандиси Шабакаҳои Барқи Ҷанубӣ Азимҷон Муҳиддинов, дар тирамоҳ ва зиистони  соли ҷорӣ интиқоли барқ ба минтақаи Қӯрғонтеппа мӯътадил набуд, минтақаи мазкур натавонист муштариёни худро   мувофиқи реҷаи  ҷудо шуда,  бо барқ таъмин намояд. Дар вилоят ба ҷойи 10 соати реҷавӣ 6, 5 соат барқ дода мешуд, зеро  дар ин давра барои минтақаи Қӯрғонтеппа аз ширкати «Барқи точик» ҳамагӣ 2 млн. 66 ҳазор кВт соат барқ муқаррар шуда буд, ки бо он ҳамагӣ     5 соат дар як шабонарӯз аҳолӣ бо барқ таъмин карда мешуд. Акнун бо барҳам хӯрдани маҳдудият барои бо барқи доимӣ таъмин намудани аҳолӣ минтақа ба 7 млн. кВт соат нерӯи барқ ниёз дорад. Ногуфта намонад, ки дар сурати самаранок истифода шудани барқ тавассути лампаҳои каммасраф барои минтақа на 7 млн. кВт соат, балки 4, 5 млн. кВт соат нерӯи барқ басанда аст.