ҶАШНВОРАИ НАВБАТИИ ДОНИШҶӮЁНИ ТОҶИК ДАР ТУРКИЯ

Истамбул,  30 апрел. (АМИТ «Ховар», Катерина  Аксакова). —  Имрӯз дар  шаҳри  Бурси  Туркия  Ҷашнвораи  чоруми  донишҷӯёни  тоҷик  баргузор мегардад, ки   дар  мактабҳои олии  Туркия  таҳсил мекунанд. Дар  ҷашнвора тақрибан  150  донишҷӯи  тоҷик  иштирок  хоҳад  кард. Мухбири  АМИТ «Ховар»  хабар  медиҳад, ки  ҷашнвора  бо  маҷлиси  умумии  донишҷӯён  оғоз  меёбад. Дар  маҷлис  ҳисоботи  Шӯрои  донишҷӯён  муҳокима  карда,  ҳайати  нави  Шӯро  ва   ҳайати таҳририяи   маҷаллаи  «Ватан» интихоб  карда  мешаванд. Ғайр  аз ин,  дар  доираи  ҷашнвора  мулоқотҳои  донишҷӯён  бо  кормандони  Сафоратхонаи  Тоҷикистон  дар  Туркия  баргузор  мегарданд. Барномаи  фарҳангии  ҷашнвора  мусобиқаҳои  гуногуни  варзишӣ  ва  консерти  рақсу  сурудҳои тоҷикиро  дар бар  мегирад. Волӣ ва  раиси  шаҳри  Бурс ба  донишҷӯён  дар  гузаронидани  ҷашнвора   кӯмак  мерасонад.