АДИБОНИ ТОҶИК САЗОВОРИ МУКОФОТИ ПАРЛУМОНИ ЧЕЧЕНИСТОН ГАРДИДАНД

Душанбе,  27 апрел. (АМИТ «Ховар», Лутфия  Эшонқулова). —  Муаллифи  китоби  «Ҳаёти барои дин фидошуда», нависандаи тоҷик Воҳид  Ғаффорӣ,  муҳаррири  масъул  ва  ҳаммуаллифи  асари  мазкур,  мушовири  калони Президенти  Ҷумҳурии  Тоҷикистон  дар  масъалаҳои  сиёсати  берунӣ  Зафар  Саидзода  сазовори  мукофоти олии  парлумонии  Ҷумҳурии  Чеченистон – ифтихорнома  «Барои  саҳми  калон  дар  рушди  муносибатҳои дӯстонаи  Чеченистон  ва  Тоҷикистон»  гардиданд.  Асари  зикршуда  моҳи  апрели  соли  равон  дар нашриёти  «Контраст» — и  шаҳри  Душанбе  чоп шуда,  ба  фаъолияти  сиёсии Президенти  нахустини  Ҷумҳурии  Чеченистон, Қаҳрамони  Русия  Ҳоҷӣ  Аҳмад Қодиров бахшида шудааст.  Муаллиф  дар  асар  симои  арбоби  барҷастаи  сиёсӣ  ва  шахсияти  муқаррарию  дар  баробари  ин такрорнашавандаро  ба  вуҷуд  овардааст. Асари  мазкур  дар  ватани  А.Қодиров  шӯҳрати  калон  пайдо  намудааст.