АЗ ВАЗИДАНИ ШАМОЛИ САХТ АЛАНГАИ ОТАШ ПАҲН ШУД

Душанбе, 2 апрел. (АМИТ «Ховар», Жасмин Назарова). – Ҳафтаи сипаришуда дар миқёси ҷумҳурӣ 15 сӯхтор рух дод, ки зарари умумии молии онҳо 26 ҳазору 690 сомониро ташкил медиҳад. Тибқи иттилои корманди маркази матбуоти Сарраёсати хадамоти давлатии оташнишонии ВКД ҶТ, масоҳати умумии сӯхторҳо 493 метри мураббаъ мебошад. Чун ҳарвақта сабабҳои рух додани сӯхтор муносибати беэҳтиётона бо оташ, вайрон кардани қоидаҳои бехатарӣ аз сӯхтор ҳангоми истифодаи асбобҳои гармидиҳандаи барқӣ ва газӣ ва расиши кӯтоҳи ноқилҳои барқӣ мебошанд. Дар давоми ҳафта дар вилояти Суғд –10 сӯхтор, вилояти Хатлон – 2 сӯхтор, шаҳри Душанбе – 2 ва ноҳияи Турсунзода – 1 сӯхтор ба қайд гирифта шуд. Аз ҷумла, 29 марти соли равон дар манзили истиқоматии шаҳрванд Муҳаммадшариф Хайруллоев, мудири шӯъбаи касалиҳои сирояткунандаи беморхонаи №1 ноҳияи Б. Ғафурови вилояти Суғд сӯхтор ба амал омад. Ба кӯшиши оташнишонон нигоҳ накарда, бинобар вазидани шамоли сахт алангаи оташ дар масоҳати 150 метри мураббаъ паҳн шуда, қисми зиёди хонаи дар наздикии ҷои сӯхтор воқеъ бударо фаро гирифт. Дар натиҷа молу амволи ҳуҷраҳои истиқоматӣ, дару тиреза, шифту фарш сӯхта нобуд гардид. Зарари аз сӯхтори ба амал омада мувофиқи ҳисоби пешакӣ 210 ҳазор сомониро ташкил медиҳад. Сабаб ва гунаҳкор муайян карда мешавад.