БАДАХШОН БО ТУХМИ ХУШСИФАТ ТАЪМИН МЕШАВАД

Бадахшон, 9 апрел. (АМИТ «ХОВАР», Лутфишо Додо).- Дар ноҳияҳои Дарвоз, Ванҷ, Рӯшон ва Шуғнони ВМКБ кишти баҳорӣ оғоз ёфт. Дар ноҳияҳои болооби рӯдхонаи Панҷ, аз ҷумла Ишкошим ва водии Ғунди ноҳияи Шуғнон ҳанӯз заминҳо зери барф буда, мавсими кишт камее дертар шурӯъ мешавад. Муовини сардори Раёсати кишоварзии ВМКБ Фарҳод Нургулов дар сӯҳбат бо мухбири АМИТ «ҳовар» гуфт, ки дар кишти баҳорӣ масъалаи аввалиндараҷа дарёфти тухмии хушсифату серҳосил мебошад. Аз ин рӯ, бо дастгирии Вазорати кишоварзӣ рӯзҳои наздик 48580 тонна тухми картошка ва 20 тонна тухми ғалладона ба Бадахшон оварда мешавад. Ин тухмиҳо хушсифат ва серҳосил буда, барои кишт манфиатовар аст.