БОРИШОТИ 11 АПРЕЛ ХИСОРОТИ ЗИЁД ВОРИД КАРД

Душанбе, 12 апрел. (АМИТ «Ховар», Жасмин Назарова). – Тавре аз дафтари матбуоти Кумитаи ҳолатҳои фавқулодда ва мудофиаи граждании ҶТ иттилоъ доданд, боришоти зиёди рўзи 11 апрели соли равон дар қаламрави ҷумҳурӣ боиси ба вуқўъ омадани ҳолатҳои фавқулодда гардиданд. Дар натиҷа ба аҳолӣ ва иқтисодиёти шаҳру ноҳияҳои вилояти Хатлон хисороти зиёд ворид карда шудааст. Инчунин дар ноҳияи Восеъ дар натиҷаи омадани сел ва баланд шудани сатҳи дарёи Ёхсу раҳнашавии соҳили дарё ба амал омада об вориди деҳаи Ғофилободи ҷамоати деҳоти Пахтакор гаштааст. Дар ин ҳодиса қариб 147 манзили зист ва амволи сокинони деҳаи номбурдаро хароб намуд. Аҳолии деҳа ба таври фаврӣ аз деҳа бароварда ба хонаҳои сокинони деҳаи ҳамсоя мувақатан ҷойгир шудаанд. Инчунин дар натиҷаи омадани сел дар Сойи Тебалай ба манзилҳои зисти сокинони кўчаи Чармгарони шаҳри Кӯлоб иншоотҳои ёрирасон ва амволи шаҳрвандон зарар диданд. Ҳолати ба амал омада таҳти назорати мақомотҳои ҳолатҳои фавқулодда қарор дошта баҳри расонидани ёрӣ ба аҳолии зарардида қувва ва воситаҳои зарурӣ сафарбар карда шудааст. Ҳаҷми ҳисорот муайян карда мешавад. Бояд қайд намуд, ки дар баробари вилояти Хатлон боришоти 11 апрел ба аҳолӣ ва хоҷагии ноҳияҳои Рудакӣ, Ваҳдат, Ҳисор, Варзоб, Файзобод ва дигарҳо низ зарар овардааст.